CEBU, Philippines - Gumikan sa gidangatan sa usa ka pamilya didto sa siyudad sa Lapu-Lapu nga giingong nalanag sa gikaong pinutos nga biskwit nga gikamatay sa usa ka 2-anyos nga bata ug pagkalandig sa unom sa tambalanan, hugot nga mipahimangno ang Department of Health (DOH)-7 sa publiko nga dili mopalit nianang mga pagkaon nga gi-repack lang.
Matud ni Rennan Cimafranca, pangulo sa Regional Epidemiology and Surveillance Unit (RESU)-7 dili angay mamalit og mga pagkaon nga pinutos lang ilabi na kung walay nakabutang nga label, brand, ug expiration date.
Kini sama sa mga gipangbaligya diha sa mga terminal nga mga biskwit nga gi-repacked nga gihulagway ni Cimafranca nga delikado.
“Di gyud dapat mag-patronize anang unlabeled, walay manufacturer, walay brand, walay expiry date na nakatatak gyud delikado gyud na,” matud ni Cimafranca.
Kahinumdoman nga usa ka pamilya ang nalanag diha sa Brgy. Punta Engaño siyudad sa Lapu-Lapu human giingong mikaon og ni-repack nga wafer stick nga miresulta sa pagkamatay sa usa ka dos anyos nga bata.
Gipaabot karon sa RESU-7 ang resulta sa gihimong eksaminasyon sa maong biskwit. Hinuon susihon usab nila ang posibleng lain pang hinungdan sa pagkalanag sa mga biktima.
Gipasabot ni Cimafranca kinahanglang apilon sa mga sanitary inspectors sa mga lokalidad pag-estrikto ang mga naninda og mga pagkaong gi-repack lang ug kadudahan ang kalimpyo niini. (BANAT NEWS)