CEBU, Philippines - Maayong pagkapiit sa usa ka 78 anyos nga lolo dihang giharos ang iyang payag-payag ug natabunan sa usa ka delivery truck nga duna’y kargang mga sabon diha sa Barangay Kanyuko lungsod sa Dumanjug sa nakalabay nga gabii.
Ang biktima giila nga si Teodoro Baybayon, nagpuyo sa maong dapit, samtang ang drayber sa truck mao si Reuben Villeno, 40, minyo nga taga Brgy. Minolos sa lungsod sa Barili.
Matud pa ni Police Officer 1 Edmund Sala ang desk officer sa Dumanjug Police nga nahinabi sa Banat News kung wala pa nasangit ug nabangga sa kahoy ang trak hayan maharos sab niini ang usa ka balay sa pag-umangkon sa biktima nga duna’y natulog nga usa ka pamilya.
Sumala pa ni Sala gikan sa Dumanjug ug paingon sa lungsod sa Barili ang trak apan pag-abot sa maong dapit nakasugat kini og usa ka sakyanan nga kusog kaayo ang suga hinungdan nga nabutahan ang drayber ug diriyot madasmag sa nag-park nga van maong gilihayan niya kini apan nalahos hinuon sa payag sa biktima.
Ang drayber gidala ‘sab sa South General Hospital sa dakbayan sa Naga tungod sa kadaot sa iyang tiil nga nahiaguman
Samtang sa lungsod sa Madridejos, usa ang patay dihang giharos sa usa ka motorsiklo ang upat ka mga batan-ong naglakaw daplin sa dalan diha sa Brgy. Tugassa nakalabay nga gabii.
Ang namatay mao si Jerald Muaña, 14, nagpuyo sa maong dapit samtang swerteng wa ra maunsa iyang mga kaubang sila si Romel Chavez, 19, Judito Negrido Jr., 17, ug Ryan Santillan, 20, pulos nagpuyo sa maong dapit.
Ang drayber sa motorsiklo naila nga si Adam James Tolentino, 21 taga lungsod sa Bantayan, nasakpang nagmaneho nga walay lisensya. Ang suspek gitanggong na karon sa kapolisan.
Sa laing bahin, naangol si SPO4 Noel Evangelista sakop sa Mambaling Police Station sa Cebu City ug ang iyang asawa nga si Bella Evangelista human sila nalimbuwad tungod sa tinapok nga lapok diha sa dalan P. del Rosario kagahapon sa buntag.
Gisusi pa karon sa Cebu City Traffic Office kun si kinsa ang maong trak nga nagyabo sa maong hugaw diha sa dalan. Ang magtiayon gidala sa tambalanan. (BANAT NEWS)