CEBU, Philippines - Nakadawat og warning sa officer-in-charge sa Cebu City Police Office ang duha ka police stations human nasakpan nga wala sa sakto’ng lugar sa checkpoint.
Mismo si Senior Supt. Marciano Batiancela ang nakabisto sa mao’ng hitabo human kini nangunay sa pagsubay sa mga dapit nga may checkpoint.
Sa pagsubay ni Batiancela sa palibot sa dakbayan sa Sugbo, duha ka police stations ang wala sa ila’ng dapit.
Hinuon si Batiancela niingon nga ang hepe sa usa ka police station niingon nga wala sila nakahimo og checkpoint sa dapit nga naadtoan niya kay duna sila’y gialarmahan nga pagpangawat ug nadakpan sab nila ang suspek. Samtang ang usa ka hepe niingon nga late sila sa ila’ng checkpoint.
“Pag-abot nako sa area wala ma’y checkpoint mao to’ng gitawagan nako ang hepe, warning pa lang to, first offense pa man pud,” matud ni Batiancela.
Si Batiancela wala motug-an kung unsa kini nga mga police stations.
Sumala pa ni Batiancela nga kung masubli, hayan mapa-ubos sa pre-charge evaluation ang hepe o ang nangulo sa checkpoint ug mag-atubang og kaso’ng administratiba.
Pahimangno ni Batiancela sa ubang police stations nga himuon gyud ang ila’ng trabaho ilabi na sa pag-checkpoint aron dili sila mag-atubang og imbestigasyon. (BANAT NEWS)