CEBU, Philippines - Gihigpitan sa coast guard sa Sugbo ang pagtala sa mga pangan sa manipesto sa mga pasahero sa ferry boat nga nagbiyahe sa Muelle Osmeña sa dakbayan sa Lapu-Lapu ug Pier 3 sa dakbayan sa Sugbo.
Matud ni SN2 Rabion Barrera sa Cebu Coast Guard nga nahinabi sa Banat News nga ila’ng giseguro ang pagklaro nga pagkasuwat sa mga pangan sa matag pasahero sa paglikay sa masinati nga kakulian sa pag-ila sa mga sakay.
Ang manipesto gitumong usab sa pag-ihap sa pasahero aron malikayan ang overloading.
Pipila ka pasahero nitug-an nga daghang higayun nga gipabalik sila sa paglinya sa tiketera alang sa pagpasuwat og usab sa mga pangan human adunay uban giwiris-wiris lang samtang ang uban binuang nga ngan ang gisuwat.
Dili tugutan sa coast guard ang paglarga sa ferry boat kung may pangan nga dili maklaro.
Giawhag sa tagdumala sa ferry boat sa matag pantalan nga tarungon gyud ang pagsuwat sa pangan, edad ug pinuy-anan aron malikayan ang kalangan sa paglarga.
Lakip sa gipatuman coast guard ang lagda sa Maritime Industry Authority sa pagpasul-ob sa life vest sa matag pasahero sa ferry boat. (BANAT NEWS)