CEBU, Philippines - Naapil og kapaig sulod sa usa ka balay ang usa ka babaye nga gikatahong duna’y kakulian sa pangisip diha sa Sitio Candalao, Brgy. Lombo sa lungsod sa Malabuyoc sa nakalabay nga hapon. Ang biktima giila nga si Jocelyn Denuyo, 29, nagpuyo sa maong lugar kauban ang iyang amahan nga si Pedro Denuyo.
Matud pa ni Bernie Baranggan, civilian PNP personnel sa maong lungsod nga nahinabi sa Banat News nag-inusara lang sa balay ang biktima kay didto sa umahan ang iyang amahan atol sa pag-ulbo sa sunog.
Katapusang nakitang buhi sa ilang silingan ang biktima nga nagdala og posporo.
Nagduda ang kapulisan sa Malabuyoc nga gidagkotan sa biktima ang ilang balay hinungdan nga kini nasunog. Gumikan kay ginama sa light materials ang maong balay dali kaayo nga midako ang kalayo ug naapil pagkasunog ang biktima.
Dugang pa ni Baranggan lagyo ra ang mga balay sa mga silingan maong dugay napalong ang sunog ug wala na nakuha ang biktima sulod sa balay.
Nagpadayon pa ang gihimo nga imbestigasyon sa Malabuyoc Police aron pagsubay pa gayod sa tinuoray nga hinungdan sa hitabo. (BANAT NEWS)