CEBU, Philippines – Napurnada ang pagpanulis sa tulo ka tulisan kagahapon sa alas 12 sa udto kay naunhan sa pagpusil sa tag-iya sa Anjes Pawnshop sa may Avilles, dakbayan sa Ormoc. Unang nisulod sa pawnshop ang usa ka tulisan ug nideklarar og tulis sa security guard gamit ang caliber. 45 apan naunhan sila sa pagpabuto sa tag-iya sa pawnshop.
Dali nga nakasibat ang mga tulisan nga wala’y nadala nga kwarta ug bisan unsa nga butang.
Matud ni PO1 Ricardo Denzo, desk officer sa Ormoc Police Station, nga ila’ng gisusi kung may CCTV camera ba ang establesemento aron masayran ang hulagway sa mga tulisan.
Sulod lang niini’ng buwana ikaduha na ang Anjes Pawnshop nga gitulis human sa Brazilian Boutique sa niagi’ng semana sa dalan Bonifacio diin pipila lang ka kilometros gikan sa Police Station.
Dili pa makatug-an si Denzo kung duna ba’y samdan sa mga tulisan kay padayun pa ang pakisusi. – /GMR) (BANAT NEWS)