CEBU, Philippines – Nalandig sa Cebu City Medical Center ang usa ka 26- anyos nga lalaki human napusilan sa guwardiya sa usa ka convenience store sa Borromeo Street, Brgy. Kalubihan ning dakbayan sa Sugbo niadtong nakalabay nga hapon.
Ang maong lalaki nga giilang si Jun Rodolp Bernie Auza gipasanginlan nangawat sa maong tindahan ug misulay og ilog sa armas sa guwardiya.
Ang guwardiya mao si Rolando Sebelleta, 20, sakop sa Golden Sun Security Agency.
Matud pa ni Police Officer 3 Jonas Catubig sakop sa alert team sa Carbon Police nga nahinabi sa Banat News nabantayan sa guwardiya si Auza nga duna’y gipangtagoang mga baligya hinungdan nga kini iyang gipangutana.
Apan mikaratil og dagan padung sa gawas si Auza hinungdan nga gikuptan sa gwardiya, apan giingong giilog niini ang armas maong napusilan sa kilid.
Dali nga gidala sa tambalanan ang suspek ug nabawi gikan kaniya ang usa ka body spray, sabon ug bubble gum. – /EIM) (BANAT NEWS)