CEBU, Philippines - Gidugangan ang gidaghanon sa mga traysikol nga makabiyahe sa dakbayan sa Mandaue gikan sa 2,500 ngadto na sa 3,000. Kini human sa giaprobahan sa konseho sa dakbayan sa Mandaue ang kausaban sa ordinansa nga giduso gipangamahanan ni Konsehal Elstone Dabon, chairman sa committee on transportation.
Sa kasamtangan, adunay 1,400 pa ka bakante’ng prangkisa sa traysikol sa dakbayan sa Mandaue.
Gitataw ni Dabon nga wala’y tinguha ang kagamhanan sa pagwagtang sa mga traysikol nga magdagan sa kadalanan sanglit nahimo na kini’ng kabahin sa panginabuhi sa pipila ka pamilya.
Giklaro niya nga buot lang nila nga ma-regulate aron usab paglikay nga makahatag pa og dugang paghuot sa kadalanan.
Samtang daghan ang nipadayag og reklamo sa gipatuman nga rerouting sa dakbayan sa Mandaue.
Kini tungod kay naghatag kini og higayun sa mga drayber sa trip cutting sama sa pagputol kutob sa merkado sa biyahe imbis molahos sa Ibabao-Estancia gikan sa dakbayan sa Sugbo.
Si Dabon niingon nga ang mao’ng reklamo sa mga pasahero iya’ng ipadangat sa Traffic Enforcement Agency of Mandaue nga gitahasan sa paghimo og dry-run sa one-way traffic sulod sa duha ka buwan. (BANAT NEWS)