CEBU, Philippines - Nipahimangno ang director sa Police Regional Office-7 nga dili modapig og bisan kinsa nga politiko ilabi na sa nagsingabot nga eleksiyon sunod tuig.
Si Chief Superintendent Prudencio Tom Bañas nagkanayun usa ka daku nga risgo alang sa kapolisan ang makonektado sa bisan kinsa nga politiko tungod kay dili gyud kini pwede kanila.
“We are not allowed to do that. Even solicit political patronage or support,” sigun ni Bañas.
Matud niya nga kung buhaton lang gyud sa kapolisan ang ila’ng trabaho, mapasalig gyud nga magpabilin sila sa trabaho ug makapakaon sa pamilya.
Sigun ni Bañas nga kung ang polis masakpan nga magtrabaho para sa usa ka politiko, pwede sila mag-atubang og kaso nga political patronage.
Matud niya nga may politiko nga mangayo og police assistance ilabi na og naay hulga sa kinabuhi apan kinahanglan pa nga moagi sa Camp Crame alang sa pagtugot. Kung ang pagpangayo og assistance maatol sa adlaw sa eleksiyon, ang Commission on Elections ang magbuot. (BANAT NEWS)