CEBU, Philippines - Duha ka anggulo karon ang gisubay sa Mandaue City Police Office sa imbestigasyon kalabot sa pag-ambush sa duha ka abogado ug sa kawani sa ilang law firm diha sa Brgy. Looc sa dakbayan sa Mandaue niadtong Huwebes sa gabii.
Ang duha ka anggulo mao ang giingong pending nga annulment sa kaminyuon sa gipatay nga si Atty. Amelie Ocañada Alegre ug sa iyang bana nga si Ryan Alegre, human niaslom ang ilang relasyon.
Ug ang ikaduha mao ang matud pa gitaktak nga empleyado sa ilang law firm nga mibahad kang Alegre. Wa hinuon pangalani sa kapolisan ang maong kanhi empleyado.
Matud ni Senior Superintendent Mariano Natuel Jr., OIC City Police Director sa MCPO, ilang gikonsiderar nga subayon ang pamahayag sa inahan ni Alegre nga si Marieta kinsa nagdudang posibleng kalambigitan sa bana sa abogada nga si Ryan sa kamatayon sa anak.
Gilaraw sa MCPO nga ipatawag si Ryan aron makuhaan og pamahayag kabahin niini tungod kay dili na maayo og relasyon ang magtiayon mao nga aduna silay pending annulment case karon sa korte.
Giklaro hinuon ni Natuel nga di suspek si Ryan gawas lamang kun adunay mga ebidensiya o sirkumstansiya nga magtumbok kaniya og kalambigitan sa maong krimen. Nasayran nga aduna nay mga witness nga nakuha ang MCPO nga posibleng makatabang sa kasulbaran sa kaso ug makahulagway sa mga mamumuno.
Gawas pa niana, gisubay usab ang mga CCTV footages sa lugar nga nakakuha sa dagway sa mga mamumuno sa wala pa mahitabo ang krimen. Ang mihimo sa pagpamanhig luwan sa usa ka motorsiklo diin ang nagmaneho sa motor naka-fullfaced helmet samtang ang backrider naka-kalo lamang.
Alang kang Natuel planado ang pagpamanhig ug professional gun for hire ang mihimo sa krimen base kini sa “groupings” sa igo sa bala nga ang tumong si Alegre ra g’yud.
Gawas kang Alegre naangol usab si Atty. Briccio Boholst ug si Antonio Pino nga pasahero sa abogada sa iyang awto.
Sa laing bahin, gipahibalo ni Sr. Supt. Rey Lyndon Lawas ang hepe sa directorial staff sa PRO-7 nga andam silang mopadala og dugang imbestigador sa maong kaso kun gikinahanglan sa MCPO.
Hinoon gipasabot ni Lawas nga dili apektado sa maong hitabo ang preparasyon sa kapulisan sa nagkaduol nga APEC Summit dinhi sa Sugbo.
Samtang si Mayor Jonas Cortes mipaabot sa iyang kasubo sa maong hitabo ug mimando sa MCPO alang sa dinaliang kasulbaran sa maong pagpamanhig nunot sa nagsingabot na nga Asia Pacific Economic Corporation Summit (APEC) karong Agosto 22. (BANAT NEWS)