CEBU, Philippines - Adunay nitumaw nga tensyon ug kagubot kagahapon sa buntag tali sa mga residente sa Doña Pepang Cemetery sa dihang subli untang padayunon sa Prevention, Restoration, Order Beautification, Enhancement (PROBE) team sa siyudad ang demolisyon sa mga panimalay.
Matud pa nanglupad ang mga pinutos nga hugaw sa tawo gikan sa mga residente padung ngadto sa PROBE.
Si PROBE OIC Wendell Cenas nagkanayon ilaha nang giandam ang kasong ipasaka batok niadtong mga nanglabay kanila tungod kay usa kini ka pag-atake sa gahom sa mando sa korte.
Nasayran nga siyam ka balay maoy demolison, apan pito pa lang ang nahuman ug tiwason unta kagahapon ang duha, apan tunga-tunga sa operasyon kagahapon gilabay sa mga residente og hugaw sa tawo ang PROBE.
Si Mayor Michael Rama mipasabot nga padayon ang pag-restore ug paghimo nga heritage park sa maong sam-ang.
Atol sa kagubot, miabot si kanhi mayor Tomas Osmeña kauban ang iyang abogado nga si Atty. Benjamin Militar.
Si Militar nagplano mopasaka og kaso batok sa siyudad tungod kay matud niya way court order ang demolisyon. Kahinumdoman nga ang korte mibasura sa petisyon ni Osmeña nga nagbabag ug ipahunong ang plano sa siyudad, hinungdan gipadayon ang maong demolisyon. (BANAT NEWS)