CEBU, Philippines - Usa ka ginang ang nadakpan sa buy-bust operation sa mga sakop sa City Intelligence Branch (CIB) sa Cebu City Police Office sa Purok 3 Upper, Brgy. Kamputhaw kagahapon sa buntag.
Giila ang dinakpan nga si Farah Fernandez, 37, duna’y lima ka mga anak ug nagpuyo sa maong dapit, samtang lakip sa nadakpan si John Joseph Galimba, 28, nga nakuhaan ‘sab og mga pinaketeng gidudahang shabu.
Matud pa ni Inspector Gomersendo Mandawe ang deputy chief sa CIB nga nahinabi sa Banat News usa ka level 3 drug pusher si Fernandez.
Sumala pa ni Mandawe napalitan og P500 nga shabu sa ilang poseur buyer ang suspek ug human gitunol ang drugas gisikop kini dayon.
Nakuha kaniya ang 96 ka gagmay’ng paketeng gidudahang shabu nga mikantidad og P52 mil, samtang nakuha sab gikan ni Galimba ang walo ka gagmay nga pakete.
Si Fernandez nga nahinabi sa Banat News kini miangkon hinoon sa maong salaod, apan matud niya nabuhat niya kini tungod kay wala siya’y trabaho ug duna siya’y gibuhing lima ka anak, ang duha pa ka tuig nga kinamanghoran adunay sakit.
Gitug-an sa suspetsado nga tag P30 ang komisyon sa matag paketeng mahalin.
Samtang sa lungsod sa Asturias kapin P70 mil nga gidudahang shabu ang nasakmit sa kapulisan gikan sa usa ka Epifanio Diapana Jr. 31, dihang nisulay pagsibat sa checkpoint sa Sitio Looc Sur, Brgy. Poblacion.
Si Diapana ang gipara sa mga polis kay wala kini nagsuot og helmet apan imbes mohunong misulay pa kini sa pagsibat apan nababagan kini sa mga polis.
Sa pagrekisa kaniya, nakuha ang usa ka medium size ug 15 ka gagmay nga pakete sa gituohang shabu nga mikantidad og P71, 390. (BANAT NEWS)