CEBU, Philippines - Kapin usa ka libo ka mga pasahero ang natanggong sa mga pantalan sa Sugbo tungod sa wala pagtugot sa mga otoridad nga pabiyahion ang mga barko tungod sa kadagko sa mga balod kagahapon.
Sumala pa sa record sa Philippine Coast Guard Cebu Station, mokabat og 1,072 ka mga pasahero padulong sa Sta. Fe Bantayan, San Carlos City, Bato, Leyte ; Baybay, Leyte; Talibon, Danao, Ormoc, Guihulngan, Dumanjug, Tagbilaran ang natanggong sa nagkadaiyang pantalan. Ang mga barkong ubos sa 250 gross tons wa tugoting makabiyahe gumikan sa gale warning sa Pag-asa.
Tungod sa kadagko sa balod kagahapon, ang Ocean Jet 168 padulong sa Tagbilaran City, nibalik sa agi dihang gihampak sa dagkong bawod sa Lawis Ledge, sa dakbayan sa Talisay, sakay niini ang kapin 300 ka pasahero ug tripulante.
Dunay mga pasahero ang nakuyawan dihang nitakilid ang fastcraft paghapak sa dagkong bawod ug nakaginhawa lang sila sa dihang nakahukom ang kapitan nga mobalik sa Pier Uno sa Cebu City. Si Vonnie Jeane Tumapon sa customer service sa Ocean Jet nibutyag sa Banat News nga luwas ra tanang pasahero.
Samtang sa dakbayan sa Toledo, kapin 50 ka pasahero padung sa isla sa Negros ang wala makalawig tungod gihapon sa kadagko sa balod ug wala tugoting makalarga ang mga roro nga barko. (BANAT NEWS)