CEBU, Philippines - Pipila ka sinehan sa Dakbayan sa Sugbo niuyon nga himuong libre ang pagtan-aw sa sine sa mga senior citizens.
Ang SM Mall, Oriente ug uban pa nga mga sinehan niuyon sa ordinansahon nga giduso ni Konsehal Richard Osmeña.
Matud sa pangulo sa Office for Senior Citizens Affairs (OSCA), Domingo Chavez, nga 90 porsiyento nga iya’ng nakita nga mapasar ang ordinansahon sa konseho.
Ang dakbayan sa Sugbo adunay 60 mil ka rehistrado’ng senior citizens nga nagdawatan og P12 mil nga cash assistance matag tuig.
Base sa ordinansahon nga libre sa sinehan ang mga senior citizens sa adlaw’ng Lunes ug Martes ug dili sa una’ng gawas sa salida.
Matud ni Chavez nga dili apilon nga libre ang iMax tungod sa kamahal niini ug mosabot usab siya sa habig sa tagdumala tungod kay kini negosyo.
Si Chavez niingon nga ang pagtan-aw sa salida sa mga senior citizens makatabang sa paglingaw ug makasinati sa bag-o nga henerasyon. (BANAT NEWS)