CEBU, Philippines – Nagtinguha ang Langub Kalunasan Multi-Purpose Cooperative nga ila na lang sabutan tali sa Kapitolyo ang pagsulbad sa kaso sa luna nga ila’ng giokupar.
Kini gumikan sa kalangan sa korte sa pagsulbad sa ila’ng motion for reconsideration sa nahauna’ng desisyon sa pagpapahawa kanila sa luna human sila gikiha ni kanhi gobernador Gwendolyn Garcia.
Gani ang chairman sa LKMPC, Engr. Amtonio Canoy, nikwestiyon sa desisyon ni Municipal Trial Court in Cities Branch 6 Judge Pamela Baring-Uy.
Gipadangat ni Canoy ang iya’ng reklamo batok kang Uy ngadto sa buhatan sa Presidente ug sa Department of Justice apan wala usab natagad.
Tinguha ni Canoy nga maangkon na nila sa hingpit ang luna nga iya sa Kapitolyo aron makapalambo sila sa ila’ng patubig sa barangay gumikan sa kakuwang sa supply sa Metropolitan Cebu Water District.
Si Bise Gobernador Agnes Magpale sa sayo pa niingon nga lisud madonar ang luna ngadto sa LKMPC sanglit mga residente sa dakbayan sa Sugbo ang nakapahimulos niini.
Hinuon sumala pa ni Magpale nga mahimo’ng sabutan nila ang isyu nga dili na kinahanglan nga moadto pa sa korte. (BANAT NEWS)