CEBU, Philippines – Maghiusa sa pagpanglimpyo ug pagpanindot sa mga dalan ang mga kawani sa kagamhanan gikan sa lokal ug nasudnong buhatan isip kabahin sa pagpangandam sa gikatakdang Asia Pacific Economic Cooperation (APEC) Summit nga pagahimuon dinhi sa Sugbo karong tuiga.
Si Association of Barangay Council (ABC) Federarion president Ernie Manatad kinsa mao usab ang tsirman sa mga kalihokan sa ika-46 Charter Day Anniversary sa siyudad karong Agosto 30 niining tuiga mipadayag nga ang pagpanglimpyo kabahin kini sa kalihokan sa charter day.
Ang dalan Plaridel gikan sa United Nations Avenue sa may tiilan sa Marcelo Fernan Bridge apil ang Ouano Avenue sa Reclamation Area lahos sa utlanan sa Cebu City.
Sa laing bahin, wa pa gihapoy desisyon kun modeklarar ba og holiday atol sa summit nga maoy usa sa ilang giplanohan aron mamenusan ang problema sa trapiko.
Matud sa Public Information Officer sa kagamhanan sa probinsiya sa Sugbo, Ethel Natera atol sa Senior Officials Meeting sa Septiyembre 5 ug 6 natunong kini sa adlaw nga Sabado ug Domingo nga menus ra ang trapik.
Sumala pa ni Natera, kinahanglan pa og pagtugot sa Malacañang ang planong pagdeklarar og holiday.
Si Tinago Barangay Kapitan Joel Garganera, representante sa Liga ng mga Barangay Cebu City uyon nga ipaubos sa holiday ang Sugbo.
Apan si Kapitan Jose Dungog, presidente sa Liga ng mga Barangay sa Lapu-Lapu City miingon mahimo rang dili modeklarar og holiday tungod kay gawas nga duna nay mga rota nga maoy agian sa mga delegado, maapektahan ang magpapatigayon niini. Kagahapong adlawa usa ka press conference ang gipahigayon nga gitambungan sa kadagkuan sa DILG-7 ug sa mga representante sa kagamhanan sa probinsiya, Lapu-Lapu, Mandaue ug Cebu City.
Tumong sa maong kalihukan aron mapahibawo ang publiko kun unsa gyud ang mga kaayuhan nga mahimong makuha sa umaabot nga APEC Summit.
Gihulagway ni Atty. Rene Burdeos, Regional Director sa DILG-7 daghang benepisyo nga makuha sa APEC sama sa pag-imbitar og dugang mamuhonan dinhi ug ang pagpakita sa maayong pamatasan sa mga Sugboanon. – /EIM) (BANAT NEWS)