CEBU, Philippines – Nakalingkawas sa tino nga kamatayon ang usa ka polis nga nagmaneho sa iyang Toyota Adventure human kini girapido sa gunman nga sakay og motorsiklo diha sa Nivel Hills, Brgy. Busay ning dakbayan sa Sugbo kagahapon sa buntag.
Ang biktima mao si Police Officer 3 Ramon Bolongaita, nagpuyo sa maong dapit ug sakop sa Regional Police Holding and Accounting Unit (RPHAU) sa Police Regional Office-7.
Matud pa ni Senior Police Officer 2 Rommel Bancog, imbestigador sa Homicide Section sa Cebu City Police Office nga nahinabi sa Banat News bag-o pa lang nakanaog sa iyang sakyanan ang sakop sa pamilya sa maong polis gikan sa simbahan.
Paingon na unta mo-parking sa iyang sakyanan ang biktima sa dihang usa ka motorsiklo ang kalit lang mitapad sa sakyanan ang duha ka mga lalaking nagsuot og helmet ug ang backrider mipusil kaniya sa makadaghang higayon dayong sibat palayo.
Ang asawa sa biktima ug iyang mga anak ang nakadungog na lang sa sunod-sunod nga buto sa armas apan wala nila naklaro ang hitsura sa mga kriminal kay nakababag ang sakyanan sa polis ug sa kapaspas sa hitabo.
Si Bolongaita nakaangkon og samad pinusilan sa kilid sa tiyan, hawak ug abaga ug gidala dayon sa Perpetual Soccour Hospital. Ang kapulisan nakarekober og pito ka basiyo sa kalibre .45 nga pistola sa crime scene.
Si Bancog nagtuo nga sa gidaghanon sa bala nga gihurot sa gunman wala g’yud kini planong buhion si Bolongaita.
“Pito ka basiyo nakuha sa crime scene, so, usa g’yud ‘to ka magazine gihurot og waswas, swerte na lang kay dili sa fatal area siya naigo,” matud pa ni Bancog.
Nagduda si Bancog nga si Bolongaita ray tuyo sa gunmen kay gipaabot pa nga makakanaog ang pamilya niini. Ang asawa sa biktima way nahibaw-ang dunay hulga sa kinabuhi sa iyang bana.
Si Kagawad Kevin Sanchez nga nahinabi sa Banat News mihulagway nga buotan ug tarong nga polis si Bolongaita sa ilang barangay ug wala kini kontra. Sa uwahing impormasyon nga nakuha sa kapulisan luwas na sa delikadong kahimtang ang maong polis nga gipaubos sa operasyon. – /EIM) (BANAT NEWS)