CEBU, Philippines - Nailhan na sa kapolisan ang usa sa mga sakop sa Laglag-Barya Gang nga nibiktima sa asawa sa kanhi konsehal sa dakbayan sa Sugbo sa nakalabay nga adlaw.
Gitudlo sa usa sa mga testigos mao si Jamboy Tagon kinsa nasikop na sa kapolisan niadto’ng Abril 8 sa kaso’ng theft.
Matud sa hepe sa Theft and Robbery Section sa Cebu City Police Office, Chief Insp. David Señor, nga positibo gyud nga giila sa testigo si Tagon nga nibiktima sa asawa ni kanhi konsehal Joey Daluz.
Sa dugang pakisusi nga gihimo sa kapolisan, gipasabot ni Señor nga wala sa ila’ng photo gallery sa TRS ang uban nga mga kauban ni Tagon kinsa’ng grupo gikataho’ng gikan sa Mindanao.
Gidudahan nga nagpuyo sa dakbayan sa Lapu-Lapu ang grupo ug sama’ng grupo sab ang nangbiktima sa dakbayan sa Sugbo ug Mandaue.
Samtang sulod sa usa ka fast food chain sa dakbayan sa Lapu-Lapu nakit-an ug narekober sa kapolisan ang mga importante’ng mga ID ug mga dokumento sa asawa ni Daluz.
Kini human usa ka trabahante ang nakabantay sa usa ka puti nga plastic ang nahabilin gikan sa mga nagkaon nga mga kustomer.
Mismo ang biktima nga si Shiela May Daluz ang niila sa mga butang human kini gipahibawo sa mga kawani sa mao’ng establesemento ug gikuha sa mga sakop sa City Intelligence Branch (CIB) sa CCPO. (BANAT NEWS)