CEBU, Philippines - Mga local government units wa pa gihapon makabaton sa standards sa pagbaton og mga search and rescue teams sa ilang mga lugar sumala pa sa Provincial Disaster Risk Reduction Management Office (PDRRMO).
Kini maoy nasayran sa tulo ka adlaw nga Provincial Search and Rescue Summit nga gihimo sa Central Command.
Matud ni Julius Regner, information officer sa PDRRMO kadaghanan sa mga lokal nga kagamhanan kuwang g’yud sa pagbansaybansay kun unsay hustong mga pamaagi aron makapahigayon og luwas ug epektibong search and rescue operations sa ilang lokalidad.
Gawas sa ekipo, kinahanglang hanas ang mga miyembro sa SAR teams sa paggamit niini. Pipila ka mga LGUs hinuon ang dunay kompletong ekipo apan kuwang sa kahibalo sa epektibong paggamit niini.
Ang unang adlaw sa summit gilangkoban sa nagkadaiyang eksena sa search and rescue operations sama sa urban search and rescue, K9 Orientation ug first aid nga gihulagway sa PDRRMO nga importante g’yud sa matag LGU.
Gidugang ni Regner, ang search and rescue summit kabahin kini sa mga programa sa probinsiya ug gihulagway niini nga magamit usab alang sa umaabot nga APEC Summit.
Gawas sa mga LGUs dinhi sa Sugbo, giimbitar usab nila ang mga SAR units gikan sa Olongapo, Bohol ug UP Mountaineers sa kaulohan.
Lakip sa mga venues nga pahigayonan sa maong summit mao ang Camp Marina ug sa South Road Properties. (BANAT NEWS)