CEBU, Philippines - Nasikop sa kapolisan sa lungsod sa San Remigio ang usa ka notado’ng tigpahuyot og drugas sa barangay Tambongon pasado alas 10 sa nakalabay nga gabii.
Giila ang dinakpan nga si Louie Japitan alyas Tambok, 29, ulitawo nga nagpuyo sa mao’ng dapit.
Ang hepe sa San Remigio Police Station nga si Chief Insp. Franco Oriol ang nangulo sa operasyon nga nisangpot sa pagkasikop ni Tambok.
Matud pa nga si Japitan ang usa sa top 10 drug personalities sa lungsod nga dugay na nga gipanid-an.
Gamit ang P200 nga buy-bust money, nakapalit og usa ka gamay nga pakete sa gituohang shabu ang asset sa kapolisan.
Nakuha gikan ni Japitan ang pinakete’ng shabu nga nikantidad sa halos P10 mil.
Gitanggong na sa karsel sa San Remigio Police Station ang dinakpan ug pasakaan sa tukma’ng kaso. (BANAT NEWS)