CEBU, Philippines – Mopahigayun og kinaugalingon nga imbestigasyon ang Commission on Human Rights sa giingong medical mishandling sa pamilya’ng Topacio hinungdan sa kamatayun sa masuso nga si Baby Christine batok sa Talisay City District Hospital.
Kini bisan kun wala’y niduol kanila nga sakop sa pamilya sa ila’ng buhatan.
Gitun-an pa karon sa CHR-7 ang kaso ni Baby Christine kinsa gilubong na niadto’ng adlaw'ng Domingo.
Matud sa officer-in-charge sa CHR-7, Atty. Arvin Odron, nga naglambigit sa katungod sa bata ang kaso.
Usa sa nakalangan sa ila’ng imbestigasyon ang kakuwang na sa ila’ng mga imbestigador human ang uban niretiro na ug ang uban na-promote na.
Matud ni Odron nga dili na nila paabuton ang resulta sa imbestigasyon sa Department of Health.
Panghinaut hinuon ni Odron ngadto sa pamilya nga moduol sa ila’ng buhatan aron usab adunay mobarug nga reklamante ug mobarug sa ila’ng ireklamo hangtud nga mahatagan og hustisya ang gituohang sayop nga pamaagi sa hospital. – /GMR) (BANAT NEWS)