CEBU, Philippines – Duha ka mga tawo ang gipangdakop sa kapulisan human nasakpan nga naglubong og usa ka fetus sa sementeryo sa Doña Pepang sa Brgy. Tejero ning dakbayan sa Sugbo kagahapon sa buntag.
Ang gidakop mao sila si Letecia Del Rosario Rafols, 48, ug John Rey Obregon, 22, nagpuyo sa maong dapit. Matud pa ni Police Officer 1 John Erick Samosa sa Homicide Section sa Cebu City Police Office nga nahinabi sa Banat News nga usa sa mga residente sa maong dapit ang mitawag sa Mobile Patrol Group (MPG) ug misumbong sa gibuhat sa duha. Nadakpan ang duha ug gipakalot og balik ang gilubong nga fetus nga gibana-banang anaa na sa tulo ka bulan nga gisulod sa usa ka garapon ug gibutang sa plastic.
Ang duha mitug-an nga gisuholan sila og P300 sa usa ka“Vasy” aron ilubong ang maong garapon apan wala sila masayod nga fetus diay kini.
Ang duha gipamulta og tagsa ka libo ka pesos kay wala’y permit ang ilang paglubong. – /EIM) (BANAT NEWS)