CEBU, Philippines – Plano karon sa opisyal sa kapulisan sa Police Regional Office-7 nga usbon ang mga pamaagi batok sa ilegal nga drugas sa mga special units sa kapulisan sa rehiyon human daghang mga target nila ang kanunay makaeskapo.
Gihimong sanglitanan ang pagkaipsot sa mga notadong bigtime drug pushers sa Sitio Dita, Pulangbato dakbayan sa Sugbo pipila ka adlaw na ang nakalabay.
Matud ni Senior Superintendent Rey Lyndon Lawas, hepe sa Directorial Staff sa PRO-7 sa mga tigbalita, wa nila isalikway nga posibleng adunay ‘hudas’ sa mga special units nga maoy nagpahibalo sa ilang mga target.
“It’s not that we are doubting our police personnel but if during our assessment and evaluation indicators would prove nga naa na siya that something we will look into,” pasabot pa ni Lawas.
Atol sa pagpangronda sa Regional Anti-Illegal Drugs Special Operations Group (RAIDSOTG-7) ug Provincial Intelligence Branch (PIB) sa Cebu Provincial Police Office (CPPO) tulo ka mga bigtime drug pushers nga pulos nag-operate sa Pulangbato ang nakaipsot.
Gusto sa opisyal nga mas palapdan pa ang preparasyon sa kapulisan sa sunod nga himuong anti-drug operations.
Atol sa maong drug raid operation kapin sa P700,000 nga kantidad sa shabu ang nasakmit sa mga otoridad. – /EIM) (BANAT NEWS)