CEBU, Philippines - Nagdangoyngoy ug pwerte’ng hilak sulod sa prisohan ang usa ka babaye nga gisikop sa mga sakop sa Mambaling Police Station, dakbayan sa Sugbo.
Kini gumikan sa pagpatuo nga business inspector ug trabahante sa Cebu City Hall sa sitio CYCO, barangay Basak-San Nicolas pasado alas 4 sa nakalabay nga hapon.
Ang dinakpan naila nga si Niña Ramirez alyas Princess, hingkod nga temporaryo nga nagpuyo sa barangay Mabolo apan lumad nga taga Mindanao. Samtang ang reklamante mao sila si Apple Jane Taboada, 24, tag-iya sa NGK Bakeshop ug Gardson Misiona, 44, usa sa mga nagnegosyo sa mao’ng dapit.
Matud ni Police Officer 3 Diosdado Andales, desk officer sa Mambaling Police Station, nga nahinabi sa Banat News nga niadto pa’ng nakalabay nga gabii nag-sige og hilak ang dinakpan sulod sa selda sa kapolisan.
Sumala pa ni Andales nga nabalaka ang dinakpan kung kinsa na ang niatiman sa iya’ng gagmay nga mga anak nga nahabilin sa iya’ng gipuy-an sa barangay Mabolo.
Si Ramirez gidakop sa kapolisan human nasakpan nga peke nga business inspector diha’ng kini niadto sa bakeshop ug nagpaila nga konektado sa City Hall ug mosubay sa mga dukomento sa mao’ng bakeshop.
Human nasubay sa suspek ang mga dukomento, kini niingon sa tag-iya nga kuwang ang iya’ng mga papeles ug nangayo og P1,500 nga bayad hinungdan nga nagduda na ang tag-iya sa bakeshop ug nitawag og polis.
Sigun pa ni Andales nga daan na sab nagduda ang reklamante nga konektado sa City Hall ang suspek gumikan sa iya’ng sinultian ug sa porma niini.
Pag-abot sa kapolisan nasayran nga peke diay nga business inspector.
Nakuha gikan sa dinakpan ang duha ka peke nga identification (ID) card sa kagamhanan sa dakbayan sa Sugbo, tulo ka business permits nga dunay nagkadaiya’ng pangan ug uban pa nga dokumento.
Nagkadaiyang kaso ang gipasaka sa kapolisan batok sa dinakpan nga gitanggong sa karsel sa Mambaling Police Station. (Jojo C. Ugdol/GMR)(BANAT NEWS)