CEBU, Philippines - Napalgang wala na’y kinabuhi ang 24-anyos nga lalaki sulod sa payag sa sitio Pandong Bato, Media Once, dakbayan sa Toledo sa nakalabay’ng adlaw.
Giila ang biktima nga si Jeneth Alferez Carpentero, residente sa nahisgutang lugar.
Usa ka Cherry Pantonial, ig-agaw ug silingan sa biktima, ang nakabantay nga adunay nagtulo nga dugo ilawom sa payag sa biktima hinungdan nga dali niini’ng gisusi.
Nisugat sa panan-aw ang patay’ng lawas sa biktima hinungdan nga dali’ng nitaho si Pantonial sa mga awtoridad.
Sa imbestigasyon nila ni SPO2 Thule Tahadlangit ug kaubanan nasayran nga niadto’ng Miyerkules pasado alas 4:30 sa buntag, usa ka Marichu Cabonillas, silingan sa biktima ang nakadungog og buto sa armas.
Nakaangkon og samad pinusilan sa wala nga bahin sa nawong ang biktima ug narekober sa crime scene ang usa ka slug sa bala sa wala matino nga kalibre sa armas. - /GMR (BANAT NEWS)