CEBU, Philippines – Nagsugod na niadto’ng Martes ang training alang sa telephone responders sa HOPELINE sa Sugbo.
Gilusad ang HOPELINE aron pagtabang sa mga tawo nga nakasinati og depresyon aron mamenusan ang mga tawo nga magkutlo sa ila’ng kinabuhi.
Nasayran nga 25 ka trainess ang ipaubos sa kapin tulo ka buwan nga pagbansay-bansay uban sa mga medical professionals aron masayud sa sakto’ng pamaagi sa pagtubag sa mga motawag sa HOPELINE.
Ang HOPELINE usa ka 24/7 suicide prevention and emotional crisis nga gisugdan didto sa kaulohan.
Si Emmalyn Fernandez, mental health coordinator sa Department of Health-7, niingon nga gikan sa nagkalain-laing bahin sa nasud ang mga trainees isip telephone responders.
Ang centers anaa sa Vicente Sotto Memorial Medical Center ug Sacred Heart Parish Church ug sa matag center dunay walo ka responders ug tulo ka shift matag adlaw.
Si Jean Goulbourn, presidente sa Natasha Goulbourn Foundation, nga nagpasiugda sa HOPELINE sa kauluhan nipadayag sa iya’ng kalipay nga nagtambayayong ang gobiyerno, simbahan ug non-government organization alang sa mao’ng proyekto.
Sigon ni Goulbourn nga basic advice lang ang pwede nga himuon sa telephone responders ug dili kini pwede makahatag og konsultasyon.
Gikatakda nga sa Septiyembre 10 ang pormal nga paglusad sa HOPELINE sa Sugbo. – /GMR) (BANAT NEWS)