CEBU, Philippines - Mokabat sa kapin P800 mil nga kantidad sa gituohang shabu ang nasakmit sa mga sakop sa San Nicolas Police Station ug kapolisan sa Borbon sa managlahing operasyon.
Usa ka ex-convict nga level 3 drug pusher nga si Liemar Monreal, 23, ang nadakpan sa buy-bust operation sa Sitio Mahayahay, Barangay Calamba dinhi sa dakbayan sa Sugbo.
Si Senior Inspector Chuck Barandog, hepe sa San Nicolas Police nga nahinabi sa Banat News mitug-an nga usa ka bulan nilang gipanid-an si Monreal.
Nadakpan siya human napalitan og P200 nga shabu ug dugang 13 ka gagmay ug upat ka medium size nga paketeng may sud nga gituohang shabu ang nasakmit kaniya nga miabot og P360 mil.
Samtang nadakpan usab ang laing level 3 drug pusher nga si Jose Leroy Flores ug duha ka kaubang sila si Jonjo Orbase, ug Pejay Pasaol sa mga sakop sa Provincial Intelligence Branch sa buy-bust operation diha sa Barangay Sagay, Borbon.
Sumala pa ni Sr. Insp. Armando Labora, napalitan og P200 nga shabu si Flores hinungdan sa pagkadakop kaniya, nakuhaan kini og lima ka medium sized packs, ug 25 small packs nga gidudahang shabu.
Matud pa ni Labora miabot og 44.25 gramos ang nakuhang shabu nga nagkantidad tanan og P522,150 base sa Dangerous Drugs Board estimates. (BANAT NEWS)