CEBU, Philippines – Higpit nga bantayan sa kapolisan ang mga nagkadaiyang relihiyosong kalihokan sa Simbahang Katoliko sa dakbayan sa Mandaue sugod sa adlaw sa Biyernes Santo hangtod na sa Pasko sa Pagkabanhaw.
Si Senior Superintendent Petronelli Baldebrin nga maoy direktor sa Mandaue City Police Office (MCPO) miingon nga ang mga presinto sa kapolisan mopadala og mga polis sa mga kalihokan.
Dugang pa niya nga magpahimutang usab og help desk sa matag simbahan nga pagadumalahon sa mga polis nga mahimong kadangpan sa mga tawo nga nagkinahanglan og tabang.
Matud pa ni Baldebrin nga sa maong adlaw mohimo usab og higpit nga pagmonitor sa mga panghitabo sa kabarangayan ilabi na batok sa tigbakay ug mga ilegal nga sugal.
Sa nasayran nga sagad sa maong mga adlaw nga walay trabaho hinungdan nga mag abot-abot usab ang mga sugarol. – /EIM) (BANAT NEWS)