CEBU, Philippines – Nakahilak sa kaguol ang usa ka 25-anyos nga lalaki human nadakpan sa mga sakop sa Cebu City Anti-Illegal Drugs Special Operations Task Force (CAIDSOTF) sa Cebu City Police Office uban sa mga sakop sa San Nicolas Police Station sa gihingusgang kampanya batok illegal drugs sa siyudad.
Ang pagpangronda gihimo diha sa Sitio Mahayahay, A. Lopez Street, Calamba ning dakbayan sa Sugbo kagabii. Ang dinakpan nga ex-convict nga nakaserbisyo na sulod sa Muntinlupa naila nga si Arman Jaca, giingong napriso na kaniadto sa kaso gihapon sa drugas.
Matud pa ni Senior Inspector Eunil Avergonzado, hepe sa CAIDSOTF nga nahinabi sa Banat News tulo ka semana nilang gipanid-an si Jaca.
Gamit ang P2,000 nga buy-bust money nakapalit og usa ka putos nga shabu ang asset sa mga polis hinungdan nga kini gisikop, misuway unta kini pagsukol apan naalirongan na kini sa mga polis kauban ang Special Weapons and Tactics (SWAT) team. Si Avergonzado miingon nga daghang mga silingan sa suspek ang mireklamong gihulga niini aron dili motug-an sa mga polis sa iyang negosyo. Matud ni Avergonzado mibalik sa pagpamaligya og drugas ang suspek human napriso kay nakakuha na hinuon kini og koneksyon sa mga dagkong drug pusher sulod sa prisohan.
Nakuha sa posisyon sa suspetsado ang pito ka dagku nga putos sa gituohang shabu lakip na ang gi-buy bust sa kapulisan nga mikantidad tanan og P2 milyones.
Lakip sab sa narekober sa kapulisan ang P5,000 nga kinitaan sa suspetsado ug ang buy-bust money.
“Dili na ako sir, bisan pa og mamatay ko sa akong gilingkoran. Paingon ko mamirenda gani sir kay para pakaon sa akong anak ug ka live-in. Tinuod nadakpan ko sa una sa drugs ‘to pero kana karon dili tawon na akoa,” panghimakak pa ni Jaca. – /EIM) (BANAT NEWS)