CEBU, Philippines – Napatay sa mga polis ang usa ka hubog nga armado ug nagmaoy, dayon misukol sa mga polis nga mubadlong unta kaniya didto sa Barangay Tabok, dakbayan sa Mandaue kaniadto’ng Sabado sa kaadlawon.
Si Arvin Misa Basaca, 36, nagpuyo ra usab sa Barangay Tabok, napusilan ug napatay sa mga sakop sa Special Weapons and Tactics (SWAT) sa Mandaue City Police Office.
Si SPO4 Marcos Noval Jr, imbestigador sa Investigation Detection and Management Bureau (IDMB) sa Mandaue, miingon nga miresponde ang SWAT sa pagpangayo’g tabang sa mga sakop sa Basak Police Station.
Ang report nagkanayon nga si Basaca hubog na ug nanghagis sa mga silingan samtang nagbitbit og armas.
Si PO2 Felolino Seno ug pipila ka sakop sa Basak Police Station nagpaila nga polis ug mihinay pagduol sa hubog nga si Basaca nga nagbitbit og 38 kalibre nga revolver.
Matud ni SPO4 Noval nga samtang nagkaduol na ang mga polis sa nahimutangan sa hubog, kalit kini nga mipusil kanila mao nga abtik kaayo ang mga polis nga nanghapa ug ang uban nangita’g kapasalipdan.
Si PO2 Seno nga armado og M16 Armalite rifle dali nga mibawos pagpusil sa hubog nga maoy hinungdan sa pagkahiagom og daghang mga pinusilan ug namatay.
Ang kapolisan gitug-anan sa mga silingan ni Basaca nga ang ilang napatay kanunay g’yud nga manghagis sa matag higayon nga mahubog.
Dugang ni SPO4 Noval nga gikunpirmar usab kini sa inahan ug igsoong babaye ni Basaca nga ang bugtong lang makabadlong kaniya mao ang ilang amahan sa wala pa mamatay. – /RUB) (BANAT NEWS)