CEBU, Philippines - Hugot nga giawhag sa Mandaue City Police Office (MCPO) ang pagbutang og mga nag-andar ug klaro nga close circuit television (CCTV) camera sa mga malls, bangko, pawnshops ug uban pa.
Matud ni MCPO Director, Senior Superintendent Petronelli Baldebrin, nga ang CCTV camera makatabang sa pagpugong sa krimen tungod kay ang mga dautang elemento magpanagana man kun masayud nga may CCTV camera ang establesamento nga buot nila’ng biktimahon.
Dugang pa niya nga kinahanglan sab nga ang mga security ca-mera functional ug klaro ang mga hulagway sa mga tawo nga makuha.
Ang ordinansa sa dakbayan nag-awhag sa mga tag-iya ug mga nagdumala og mga negosyo sa pagpataud og CCTV camera nga mag-andar sulod sa 24 ka oras.
Dugang pa niya nga bisan ang mga buhatan sa kagamhanan sa dakbayan nga naglakip sa national, mga simbahan, public plaza, terminal ug mga dalan nga daghang molabay nga sakyanan kinahanglan gyud unta nga kabutangan og CCTV camera tungod kay daku kini og ikatabang sa imbestigasyon nga ilang himuon sa mahitabo’ng krimen. (Romeo T. Limpangog/GMR)(BANAT NEWS)