CEBU, Philippines - Isyu sa yuta ang gitan-aw karon sa kapolisan nga motibo sa plano’ng pagpatay sa barangay kapitan sa Babag, dakbayan sa Sugbo.
Kini ang gitug-an ni barangay kapitan Cesar Dolorito kinsa usa sab sa consultant sa mga yuta.
Matud ni Dolorito nga sa iya’ng trabaho posible gyud nga may maligsan nga mga tawo.
“Seguro naa’y natabangan nato nga nidaug sa kaso unya napilde to’ng kalaban na find out nila ako’y nagtabang seguro mao’y motive seguro, mao na’y akong trabaho land consultancy ang akong mga kliyente Luzon, Visayas, Mindanao,” matud ni Dolorito.
Nagduda ang kapitan nga nasaypan sa mga killer ang iyang body guard kay pareho kini og gisuot nga kolor sa senina samtang nagkaon sa usa ka restaurant sa Don Gil Garcia St. Capitol Site.
Gihimakak sa kapitan nga nakadispalko siya og P6 milyones base sa pasangil sa usa sa nadakpan nga si Charlie Garces nga ang iyang patyon nga tawo dunay utang nga P6 milyones.
Ang bodyguard sa kapitan nga si Romeo Malise nga una’ng gipusil niingon nga pwerte niini’ng kurata diha’ng giduol sa gunman dayun pusil apan swerte kay wala nakabuto ang armas. Si Senior Supt. Mariano Batiancela, officer-in-charge sa Cebu City Police Office, nitambag ni Dolorito nga dili magpareho ang “routine” sa iyang trabaho aron dili masundan sa mga may dautan og plano.
Samtang ang hepe sa City Intelligence Branch, Supt. Romeo Santander, niingon nga nagpadayun ang ilang pagpangita sa usa ka kauban sa gunman nga nakasibat nga gikataho’ng taga lungsod sa Tabogon.
Sigun pa ni Santander nga ila sab nahibaw-an nga dunay duha ka spotters ang tulo ka gunmen ug kini ang ilang gipangita karon.
Dili lang ang mga gunmen ang target karon sa kapolisan nga sikopon apan lakip nga mahibaw-an ang nagsugo o mastermind sa maong palpak nga krimen.
Nasikop sila si Garces ug Froilan Orlanes kinsa napusilan sa body guard sa kapitan. (BANAT NEWS)