CEBU, Philippines - Ang Ombudsman Visayas mimando sa Department of Interior and Local Government (DILG) sa pag-implementar sa suspension order batok kang Mayor Cynthia Moreno ug sa bana niining si Bise Mayor Augustus Caesar Moreno kabahin sa giingong kalapasan nila sa Section 361 paragraph (e) (4) sa Government Accounting and Auditing Manual (GAAM).
Sa maong kaso batok sa magtiayong Moreno ang Ombudsman Visayas miluwat og desisyon niadtong Abril 14, 2010 ug giaprobahan kini niadtong Oktubre 10, 2011 ni Ombudsman Conchita Carpio-Morales.
Ang kaso mahitungod kini sa duha ka mga gubaong dump truck nga gipanag-iya sa lungsod nga giingong gipamaligya sa duha nga wala moagi og bidding.
Ang kanhi konsehal sa lungsod nga si Danilo Margallo maoy mipasaka og kaso ngadto sa Ombudsman batok sa magtiayong Moreno.
Sila si Konsehal Mariolito Biton Jr. ug Claudio Gacang mao nay pormal nga milingkod isip acting mayor ug vice mayor sugod niadtong Miyerkules. (BANAT NEWS)