CEBU, Philippines - Nagkurog pa sa kahadlok nga nidangop sa kapolisan ang cashier nga lalaki sa usa ka bakery sa Labogon, dakbayan sa Mandaue human gitulis sa nagbinugtong nga armado’ng lalaki alas 10 pasado ang takna sa niaging gabii.
Si Senior Police Officer 2 Edmundo Bilocura sa Presinto 3 sa Mandaue City Police Office (MCPO) niila sa bakery nga mao ang Julies Bakeshop nga nahimutang sa mao’ng dapit.
Matud ni Bilocura nga tungod kay dili kaayo daghan ang mga kustomer niadto’ng orasa, ang cashier nga si Antonio Reyes, 22, nag-inventory sa ila’ng baligya nga ice cream.
Lalit lang nisulod ang wala hiilhi’ng lalaki ug gitionan sa kutsilyo ang biktima dungan ang pagpamulong nga “tulis ni ug ayaw paglihok aron dili ka taruyan niining giti-on ko’ng kutsilyo.”
Ang biktima igo na lang nagtan-aw nga gipanguha sa tulisan ang kuwarta sulod sa kaha.
Human makuha ang salapi nga P1, 400, nagdali paggawas ang tulisan ug kalma lang kaayo nga naglakaw sa dalan pahilayo sa lugar. (BANAT NEWS)