CEBU, Philippines – Nagprotesta ang mga molupyo sa dakbayan sa Lapu-Lapu ug lungsod sa Cordova kagahapon atubangan sa Provincial Environment and Natural Resources Office (PENRO) sa pagpalanug sa ila’ng pagsupak sa pag-ugmad sa reclamation project sa barangay Gabi sa maong lungsod. Gisinggit sa mga sakop sa Pundok sa Nagpakabana sa Natad sa Kalikupan (PNNK) ang ilang kasagmuyo ngadto sa maong buhatan nga nahimutang sa Pier 3, dakbayan sa Sugbo.
Usa sa ilang pangutana kung unsa’y gibasehan sa paghatag og permit sa proyekto. Si Jojo Daquis, tigpamaba sa grupo, niingon nga sila ang naningkamot sa pagtabang nga kahatagan og pagtagad ang nahitabo’ng oil spill human sa panagbangga sa duha ka barko sa kadagatan sa dakbayan Talisay.
“Miabag gyud kami sa atong mga opisyales local aron mahatagan og proteksyon ang atong mga kabakhawan unya karon ato na hinuon nga tam-ukan,” matud ni Daquis.
Nanghinaut si Daquis nga ang mga opisyales sa PENRO mohatag sa tinud-anay nga kasayuran sa gipatuman nga reclamation project. – /GMR) (BANAT NEWS)