CEBU, Philippines - Angol ang amahan ug ang 17-anyos nga anak human gipangtigbas og sanggot sa usa ka lalaki samtang nagkobra sa niaging hapon sa barangay Poblacion, lungsod sa Sibonga.
Ang nangaangol naila nga sila si Joel Patalinghug Sr., 48, panday ug si Joel Jr. samtang ang suspek naila nga si Raul Redoblado, 39, taga Lamacan, sa mao’ng lungsod.
Ang mga biktima naglinya sa tindahan ni Liezel Teogangco aron mokobra sa ilang sweldo pasado alas 3 sa hapon.
Ang suspek kalit lang niabot nga nagdala og sanggot ug nideretso og tigbas kang Joel Sr. sa iya’ng buko-buko.
Diha’ng nakabantay si Joel, Jr. iyang gisuwayan og uwang ang suspek apan gihapsan siya ug maayo’ng pagkaigo sa iya’ng ulo. Daling nisibat ang suspek samtang ang amahan ug anak gidala sa tambalanan.
Nagduda ang kapolisan nga panimalos ang motibo sa suspek tungod kay natigbasan man sab siya sa biktima sa niagi’ng buwan. (BANAT NEWS)