CEBU, Philippines - Giduaw ni Bise Presidente Jejomar Binay ang mga nasunogan sa Barangay Basak-Pardo ug Kamputhaw kagahapon ug nanghatag og mga hinabang sa mga nasunogan.
Sa report sa TV Patrol Central Visayas kagahapon, ang mga nasunogan sa Basak-Pardo malaumon nga matabangan silang tugotan nga makatukod pagbalik sa ilang mga balay diha gihapon sa maong dapit.
Human sa pagduaw, milahos si Binay sa Barangay Apas diin usa ka ‘boodle fight’ ang gihimo nga maoy sagad niyang gibuhat matag anhi dinhi sa Sugbo.
Si Binay usab ang pinasidunggang dinapit sa pagsaulog sa Integrated Bar of the Philippines sa ilang ika-15 nga National Convention nga gitambongan sa dos mil ka mga abogado.
Giklaro hinuon ni Binay nga trabaho ug dili pangampanya ang iyang gianhi dinhi sa Sugbo.
Si Binay kinsa nag-una gihapon karon sa Pulse Asia Survey bisan sa mga pasangil kaniya ug sa iyang mga anak miingon masaligon nga dako gihapon ang pagsalig kaniya sa katawhan.
"Ito ay nagpapatunay lamang na ang taumbayan ay hindi naniniwala sa mga kasinungalingan nila," sumala pa niya.
Nagtuo si Binay nga pulos may bulok politika ang tanang mga kasong gipasaka kaniya ug sa iyang pamilya. (Edwin Ian Melecio gikan sa The Freeman)