CEBU, Philippines - Nagtingkagol na karon sa prisohan sa Naga City Police ang duha ka magsoon nga gipasanginlan nga milugos sa usa ka 34- anyos nga babaye’ng mabdos og lima ka buwan diha sa Sitio Ludo, Barangay Langtad sa maong siyudad.
Ang gitudlong suspetsado sa kremin naila nga sila si Leonardo Labrado ,38, ug Nelson Labrado, 26, pulos mga minyo nga silingan ra sa biktima. Ang biktima lumad nga taga Iligan City nanimpalad dinhi sa Sugbo kauban ang iyang bana nga usa ka panday ug duha ka gagmay nga anak.
Sumala pa sa hepe sa Naga City Police, Superintendent Brindo Nacario nga nahinabi sa Banat News, lima pa ka buwan ang pamilya sa biktima sa lungsod sa San Fernando ug namalhin og puyo sa Naga mga tulo pa lang ka semana ang nakalabay.
Matud niya nahitabo ang kremin sa dihang atoa sa trabaho ang bana ug ang biktima ug duha ka gagmay nga anak mao lang ang nabilin sa balay.
Sumala pa nga samtang sila nangatulog kalit lang misulod ang mga suspek ug gibanos-banosan siya og lugos sa duha. Human sa krimen misumbong ang magtiayon sa kapolisan hinungdan nga nadakpan ang magsuon.
Gumikan sa hitabo na-trauma ang biktima ug gikinahanglang atimanon sa mga doktor. Ang magtiayon midangop na sa buhatan ni Bise Gob. Agnes Magpale. (BANAT NEWS)