CEBU, Philippines — Nasikop sa Criminal Investigation and Detection Group ang usa ka lalaki sa entrapment operation sa niaging hapon human gipasanginlan nga nibaligya sa iya’ng yuta sa duha ka higayun sa managlahi’ng buyer.
Ang nasikop naila nga si Jeremias Carloman Abad, 48, taga Gotchan, Mambaling, dakbayan sa Sugbo, human gidawat niya ang “dusted money” gikan ni Ranz Andri Medina, 34, taga Mabolo.
Si SPO2 Roel Leyson, sa CIDG-7, niingon nga gibaligya ni Abad ang luna nga yuta sa kantidad nga P1 million.
Kapin sa tunga sa milyon na ang iyang nabayad sa binuwan nga data-data apan Contract to Sale lang ang ilang gipirmahan.
Nabantayan ni Medina nga gibaligya diay ni Abad ang maong luna sa laing tawo ug duna na sila’y gipirmahan nga Deed of Sale.
Ang operasyon nga gipangulohan ni Supt. Fermin Armendarez gitayming sa gikatakda nga pagbayad ni Medina sa binuwan nga datahan sa kantidad nga P10 mil.
Human sa pagtunol ni Medina sa kwarta sa usa ka coffee shop sa mall sa Uptown area, nisinyas ang kapolisan nga dakpon si Abad hinungdan sa pagkasikop.Natanggong si Abad sa CIDG-7 detention cell apan nagdumili kini sa paghatag og pamahayag. (BANAT NEWS)