CEBU, Philippines — Usa ka lalaking hubog nga gi-‘safekeeping’ sa karsel sa kapolisan sa lungsod sa Dalaguete ang namatay human gikatahong nabunal sa sulod sa prisohan.
Ang namatay naila nga si Joel Amaba, 43, molupyo sa Barangay Lanao sa maong lungsod.
Base sa imbestigasyon sa kapolisan gitanggong si Amaba tungod kay gireklamo kini sa duha ka negosyante nga sila si Daisy Regala ug kapuyo niini nga si Charles Bowers, Amerikano, taga Tapon, Dalaguete.
Matud pa nga niadtong Biyernes, namugos si Amaba pagsulod sa tindahan sa duha ug giataki niini si Bowers ug ang mabdos nga si Regala.
Naigo sa iyang tiyan si Regala hinungdan nga gidala kini sa tambalanan sa Dumaguete City.
Matud pa sa live-in partner ni Amaba nga si Prima Cañete, saleslady sa tindahan, nga sa pag-abot ni Amaba sa tindahan hubog na kini ug posible nga nagselos kini.
Ang mga kauban ni Amaba nga piniriso nga nakakita sa hitabo miingon nga nakig-estorya kanila ug milakaw kini padulong sa kasilyas aron mangihi.
Apan sa iyang pagbalik kalit lang siya nga natumba sa salog ug nabunal ang ulo hinungdan nga gidala sa Julio Cardinal Rosales Hospital apan gideklarar na kini nga dead on arrival. (BANAT NEWS)