CEBU, Philippines - Nalandig sa tambalanan ang usa ka dispatser human dunggaba sa iya’ng kauban tungod sa lalis sa tagpiso sa dalan Magallanes, San Roque, dakbayan sa Sugbo.
Ang biktima naila nga si Erwin Ylagan, 42, samtang ang suspek giila lang sa pangan nga Dennis, hingkod nga nagpuyo sa maong lugar.
Matud ni SPO4 Alex Dacua, imbestigador sa homicide section sa Cebu City Police Office, nga nasuko ang suspek human sila wala nagkasabot sa bahinay sa sinsiyo nga gihatag sa drayber sa PUJ.
Sa kalagot sa suspek, nikuha sa iyang dala nga kutsilyo ug dayun dunggab sa biktima igo sa iya’ng tiyan.
Human sa hitabo dali nga nisibat ang suspek samtang ang biktima ang gidala sa Cebu City Medical Center ug luwas na sa delikado’ng kahimtang. (Jojo C. Ugdol/GMR)(BANAT NEWS)