CEBU, Philippines - Nasikop sa mga sakop sa City Intelligence Branch ang usa ka hitman nga gipangita sa barangay Inayawan sa niagi’ng gabii.
Ang dinakpan naila nga si Ariel Mesias alyas Paking, 33, ulitawo nga taga sitio Kabayoan 2, San Roque, dakbayan sa Talisay.
Matud sa deputy chief sa CIB, Insp. Gomersendo Mandawe, nga dugay na nila nga gipanid-an ang suspek nga abtik sab nga molikay sa mga awtoridad ug nalambigit sa mga krimen sa maong lugar.
Apan usa ka tawag ang nadawat sa mga sakop sa CIB gikan sa usa ka concerned citizen nga nagpahibawo nga dunay usa ka armado’ng tawo ang nasigpatan sa maong lugar.
Dali’ng girespondehan sa kapolisan ug naabtan ang suspek kinsa misuway pa unta og sibat apan nalibutan na sa mga sakop sa CIB ug wala na nakabunot sa iyang armas.
Nasuta nga si Mesias usa sa mga gipangita sa kapolisan ug giila nga “hitman” sa lugar.
Nakuha gikan sa suspek ang usa ka .357 revolver nga may lima ka bala.
Si Mandawe nipasabot nga sugod pa lang kini sa kampanya sa kapolisan sa pagsikop sa mga badlungon sa maong lugar.
Ipaubos sa ballistic examination ang revolver nga nasakmit gikan sa suspek aron masuta kung wala ba kini nagamit sa mga krimen sa maong dapit.
Gitanggong na sa Cebu City Police Office detention cell ang dinakpan ug pasakaan sa tukma’ng kaso. (Jojo C. Ugdol/GMR)(BANAT NEWS)