CEBU, Philippines - Gireklamo sa mga lumolupyo sa dakbayan sa Mandaue ang hilabihan kakusog sa tingog sa tambutso sa mga motorsiklo panahon nga lawom na kaayo ang gabii.
Usa ka retirado nga magtutudlo nga nagpuyo sa dalan P. Burgos sa Barangay Alang-Alang, Dakbayan sa Mandaue miingon nga nakatugaw sa ilang pagkatulog ang kasaba sa tambutso sa motorsiklo nga maghaguros sa pagpadagan nga molabay sa ilang dapit.
Si Mayor Jonas Cortes nga nahinabi sa Banat News miingon nga nakadawat na usab siya sa maong reklamo ug bisan siya nakamatikod sa pagdaghan niining saba nga tambutso.
Gimando ni Cortes ang paghimo og operasyon batok sa maong mga matang sa motor nga banha og tambutso. Ang saba nga tambutso adunay multa base sa Joint Administrative Order No. 2014-01. (BANAT NEWS)