CEBU, Philippines - Patay ang usa ka lola nga gikan sa simbahan human nasampak sa usa ka van sa Poblacion, Santander pasado alas 6 kagahapon sa buntag.
Ang biktima naila nga si Tita Jugo, 74, nagpuyo ra sa maong lugar samtang ang drayber sa sakyanan nga nakabangga giila nga si Benjie Baring, 30, taga dakbayan sa Bogo ug nitahan sa kapolisan sa lungsod sa Oslob.
Matud ni Henry Laurente, non-uniform officer (NUP) sa Santander Police, nga gikan nisimba ang biktima ug paingon na unta nga mopauli.
Apan sa iyang pagtabok wala nabantayi ang naghaguros nga van gikan ni-overtake sa Ceres bus.
Gumikan sa kakusog sa bangga, nilupad ug nalukotlukot sa karsada ang biktima ug nabagnos pipila ka metros.
Sigun pa ni Laurente nga niliki ang ulo sa biktima ug nakaangkon sab kini og grabe’ng bun-og sa kalawasan hinungdan nga nakabsan sa iya’ng kinabuhi.
Sumala pa ni Laurente nga si Baring wala nihunong sa lugar atol sa hitabo kay nahadlok sa mga paryente sa iyang nabanggaan ug kini nideretso na lang sa Oslob Police Station.
Kasamtangan na nga gitanggong sa Santander Police Station ang drayber sa van. (BANAT NEWS)