CEBU, Philippines – Gideklarar sa mga opisyal sa dakbayan sa Toledo pinangulohan ni Mayor John Henry “Sonny” Osmeña nga uyon sila sa total ban sa pangubkob og bas ug graba sa Sapangdaku River sa barangay Magdugo.
Sila si Osmeña ug ubang opisyal sa dakbayan gipatawag sa sesyon sa hunta probinsiyal kagahapon alang sa katin-awan sa isyu sa quarry operations sa nahisgutang lugar.
Si Osmeña nipadayag nga uyon sila sa plano sa hunta probinsiyal ug gani ang konseho sa dakbayan nipalabang na og resolusyon alang sa moratorium sa quarry operations.
Matud ni Osmeña nga kinahanglan nga ipahunong usab ang pag-isyu og delivery receipts nga matud pa sa hepe sa Provincial Environment and Natural Resources Office, Atty. Chad Estella, nga makig-estorya pa siya sa Mines and Geo-Sciences Bureau nga maoy mo-isyu sa delivery receipts.
Gawas niini ipahunong na usab ang pag-isyu sa processing permit sa dakbayan.
Gipasabot ni Estella nga ang processing o washery naglambigit gihapon kini sa quarrying hinungdan nga ipakanselar ang ilang permit. Usa ka task force ang tukuron sa Kapitolyo alang sa Sapangdaku. – /GMR) (BANAT NEWS)