CEBU, Philippines- Nagpadayon ang pagpalambo sa mga buhatan sa dakbayan sa Toledo ilabi na sa ilang computerization program ubos sa pamunoan ni Mayor John Henry Osmeña.
Ang Government Information Computer Services (GICS) maoy gitahasan sa mayor pagbutang og mga computers sa mga buhatan sa siyudad. Si Rex Ybañez, administrator sa GICS Toledo miingon nga kompletuhon nila ang pagbutang og mga computers sa napulo ka opisina sa city hall nga nahimutang karon sa Barangay Ilihan.
Usa na niini ang buhatan sa Treasurers Office nga kinahanglang paspas ang transaksiyon ilabi na sa mokuha og official receipt nga maoy gamiton sa paglukat og mga dokumento sama sa sedula, police clearance ug uban pa.
Gituyo sa kagamhanan sa Toledo nga mailisan og mga bag-ong computer ug software ang matag buhatan aron mas paspas ug dali nga proseso sa mga dokumento.
Ang pag-ilis sa mga bag-ong kahimanan gisugdan sa GICS sa nakalabay pang buwan. (BANAT NEWS)