CEBU, Philippines- Patay ang usa ka amahan human gibangaan sa motorsiklo ang gisakyan nga traysikad uban sa iya’ng pamilya sa Barangay Okoy, lungsod sa Santa Fe, isla sa Bantayan pasado alas 6 sa hapon niadto’ng nakalabay nga adlaw.
Patay si Luis Giducos, 47, samtang nakaangkon og mga bun-og sa kalawasan ang iyang asawa nga si Amelita, 46, ug ang ilang anak nga si Gretchen, 19, taga Poblacion sa maong lungsod.
Ang drayber sa motorsiklo giila nga si Ryan Alcomera, 27, ulitawo nga nagpuyo sa maong lugar ug wala’y napakita nga driver’s license atol sa hitabo.
Nadala pa sa tambalanan ang amahan apan pasado alas 11 sa gabii diha’ng gibiyahe ang biktima paingon sa tambalanan sa dakbayan sa Sugbo, nakabsan gyud sa iyang kinabuhi tunga-tunga sa lawod gumikan sa daku nga samad sa iyang ulo.
Ang drayber sa motorsiklo kasamtangan nga gitanggong sa karsel sa Santa Fe Police Station ug nagpaabot kung mopasaka ba og kaso o makig-areglo ang tagtungod sa biktima. (BANAT NEWS)