CEBU, Philippines - Dugang tigum ang himuon may labot sa pagpangandam sa seguridad sa Asia-Pacific Economic Cooperation (APEC) Summit.
Kini ang gibutyag sa commanding officer sa 302nd Brigade sa Philippine Army nga nagbase sa Negros Oriental nga si Colonel Allan Martin.
Matud ni Martin nga nagpahigayun na sila og training sa mga personnel nga madestino unya sa APEC. Ang 302nd Brigade nag-cover kini sa Negros Oriental, Cebu ug Siquijor. Gipasabot ni Martin nga sa Sugbo ipahigayun ang APEC Summit hinungdan nga ang Central Command sa Armed Forces of the Philippines ang mo-handle sa security plan.
Karong Agosto 24 hangtud Septiyembre 6, 2015 ipahigayun ang una’ng APEC meeting sa Sugbo.
Sundan kini sa Septiyembre 7,8,9 ug Finance Ministerial Meeting sa 10 ug 11, 2015.
Sa Oktubre 8 ipahigayon ang Transportation Ministerial Meeting ug sa Oktubre 12 hangtud 14 ipahigayun ang Energy Ministerial Meeting.
Matud ni Martin nga sama sa ubang VIP security operation, ang military anha sa “3rd ring” diin ang “1st ring” langkuban sa “close in security” kinsa ang mopili niini ang nasudno’ng kagamhanan ug ang “2nd ring” langkuban sa kapolisan. (BANAT NEWS)