CEBU, Philippines - Naghikog ang usa ka bata’ng lalaki human gipasanginlan sa silingan nga nangawat sa iyang balay sa niaging gabii sa sitio Tagasa, Bitoon, lungsod sa Daanbantayan.
Ang naghikog patay naila nga si Angelito Tila-on, 15, taga sitio Kauswagan, Poblacion, sa maong lungsod.
Si PO1 Roberto Dapat, desk officer sa Daanbantayan Police Station, niingon nga si Tila-on nakit-an na lang sa mga bata nga nagbitay nga hinigtan ang liog sa punoan sa Talisay sa baybayon sa barangay Bitoon pasado alas 9 sa niaging gabii.
Sa sayo pa sa kagabhion nakit-an ang bata sulod sa balay ni Sheila Gulfan kinsa nisiyagit nga nangawat si Angelito hinungdan nga nikaratil og dagan ang bata.
Human niadto’ng hitaboa nahibulong na lang ang amahan nga usa ka traysikad driver nga wala na niuli sa ilang balay ang bata hangtud napalgan sa ubang bata nga nakaagi sa maong lugar nga si Tila-on patay na nga nagbitay.
Wala’y saksi sa paghikog sa bata samtang wala’y sinyales sa foul play ang kamatayun.
Nagtuo ang kapolisan nga nauwaw ang bata sa iyang gibuhat o nahadlok sa iyang amahan hinungdan sa pagpakamatay. (BANAT NEWS)