CEBU, Philippines - Lain na usab nga ahente sa sigarilyo ang nabiktima sa mga tulisan nga magmotor ug prisuhon ang mga biktima sud sa ilang van diha sa A.P. Cortes sa Barangay Tipolo, Mandaue City.
Mokabat sa P60 mil nga halin ni Alvin Etable, 27, taga Singson Village sa Sitio San Vicente, Barangay Subangdaku sa maong dakbayan ang nasakiyo sa tulo ka armadong tulisan.
Sumala pa ni Senior Police Officer 1 Michael Limalima sa Presinto 2 ang truck helper nga gikan pa naghatod og sigarilyo sa ilang suking tindahan nakaabot pa sa tulo ka tulisan apan wa makabantay nga gitulis na diay ang iyang mga kauban.
Matud pa nga gisugat kini sa usa sa mga tulisan ug giagbayan ug gikuha ang dala niining bag nga adunay sulod t-shirts ug pagkahuman gipalakaw siya niini.
Human makuha ang bag gimandoan ang ahente sa pagsulod sa ilang delivery van ug gipangkandadohan.
Ang truck helper nga wala malakip sa gitanggong sa van daling nangayo og tabang aron makagawas ang mga kauban, apan wala na diha ang mga tulisan.(Romeo T. Limpangog/EIM)(BANAT NEWS)